Demae Itcho!

細細個就鐘意食雜糧, 次次都係爸爸買返黎的. 印尼蝦片, 蝦條, 桃蝦多, 益力多, 綠箭香口膠, 黃箭香口膠, 嘉頓加拿餅, 聰明豆, 麥提沙....嘩...統統都係摯愛. 呢d野阿媽梗話無益, 所以細個咪唔鐘意食阿媽煮既飯咯, 淡而無味. 就算煮快熟面, 都會淨係煮蝦子面. 後期大大下, 阿媽變得越黎越懶hehe...竟然買左"出前一丁"返屋企!!!!! 對於呢個一直受禁制既家庭食品突遭解封, 簡直開心死啦, 阿媽買下又一種味, 買下又一種味, 不過最終都係鐘意原味同雞湯味. 好似係佢自己鐘意食多過我鐘意食. 就係咁, 係舊屋個廚櫃裡面, 永遠都會有"丁麵"既存在. 呢個意義好重大, 証明左阿媽開始唔鬼理我, 令我既飲食自由市場空間大左, 想食既野多左, 體重亦有年年上升既趨勢. 阿媽一唔係屋企, 就會乘機煮"丁麵", 有時仲會起"雙飛"添噃hohoho.......

細個成日聽d同學仔講話出前一丁有膠質, 會黐實d腸. 今日諗番, 真係好鬼記得有個小學同學仔話佢姨媽就係咁樣黐實晒d腸死左. 唔......我對佢姨媽既死深表婉惜, 但我對佢既死因, 心表懷疑. 究竟, 係佢阿媽想藉姨媽既死乘機嚇佢唔好食咁多出前一丁?定係佢其實就係出前一丁既死敵"香港永南公仔麵"既後人, 想從校園出招打擊競爭對手呢? 點都好, 呢d咁既傳言, 我細細個就知係假架啦! 唔係掛, 食麵會黐實d腸? 我諗如果佢話佢姨媽食丁麵唔咬斷就咁吞, 所以kick住晒d腸, 會可信少少咯. 最搞笑係, 呢個同學仔之後亦和我同一間中學, 佢仲係校內高材生添, 中五時仲坐我隔離, 有日我問番佢姨媽單野, 佢淡淡一句話:"我唔記得咯喎!...." 嘩! 唔係掛! 呢個係咩答案, 單野我記足六,七年, 你家陣竟然話我知唔記得!!!!! 點搞呀, 咁究竟你有無姨媽架!

算吧, 人地話唔記得,我亦無謂強人所難, 點都要比番個下台階人既. 証人失憶, 係疑點利益歸於被告的普通法權益下, 都算還了"出前一丁"一個清白! 向"出前一丁"創辦人安藤百福致敬!