摺埋

請移玉步 http://hk.myblog.yahoo.com/kwsharon

玻璃瑤柱羹

玻璃瑤柱羹製法:

材料: 玻璃樽一個，超市膠袋一個，大量瑤柱

做法：
1. 先將大量新鮮瑤柱放入玻璃樽內，封密．
2. 將盛滿瑤柱之玻璃樽以超市膠袋裝起，綁好袋口，然後放入冰箱備用．
3. 煲湯前把玻璃樽從冰箱取出，解開袋口結．
4. 解結時鬆手，成樽野連膠袋跌落地，直至整個樽身碎裂，玻璃碎均勻入滲瑤柱．
5. 有種便可上碟．

以上資料由老公提供．

馬路天使

噢, 昨晚差點衝紅燈. 同老公+朋友由青衣出發諗住返TKO, 行梗條線又焗轉右, 拿拿聲梗係cut 番中線啦, 一心諗住係出大路上斜以為直駁公路, 點知原來上行斜路無啦啦有盞紅綠燈!!!!! 好彩最後係大家, 尤其係老公既"歡呼聲" 中即係停左車.......
最後平安無事返到TKO, 但竟然泊L位都泊斜晒haha....同練習差好遠呀!!! 路面經驗還差一點點, 雖然攞牌咁耐, 其實都係近兩年先有得叫做係咁易"楂下"咁, 我仲要"受訓"幾耐, 先可以一個人楂下咁呢? 真係羞家haha...

今晚都係唔去BBQ, 費事連車都燒埋啦!!! hehe...

馬拉松

今天問朋友借了車, 行程如下:

九龍城-->將軍澳-->長沙灣-->何文田-->上環-->西環-->將軍澳

原來一連楂五個鐘頭車係好攰架!!!!!!!!

Eng唔English?

昨天去麥當勞食麥旋風既時候, 突然聽到有個阿媽同佢個BB女用好溫柔的聲線講: "鐘唔鐘意食HamBURger呀?" 聽罷, 心裡不禁一寒. 但係隔左一陣, 個女人又黎料: "媽咪好hungry呀!" 接住佢老公又講:"飲唔晒比媽咪飲啦, 媽咪thirsty". 呢番對話已經搞到我起晒雞皮. 不過, 原來最精警都係個阿媽最後彈左一句: "D野食Yum唔Yummy呀?"....就憑個位師奶呢句說話, 令我以一個好敬佩既眼光......啤住呢家人.

呢對父母真西利, 唔單止識英文生字, 仲識英文造字. 本人唔係唔鼓勵自小教導子女講英文, 不過, 請各位家長們make sure你地講緊既係英文先好咯. 呢對父母好努力, 用盡佢地識既英文單字去同個女溝通, 以為咁可以薰陶個女既英語能力. 好可惜, 佢地係一餐30分鐘唔夠既快餐時間, 連犯數個英語最基本錯誤:

1. 錯重音
Hamburger的重音應該在字首, 即HAM-burger, 而非ham-BUR-ger. 至於為何大部份香港人都會讀成ham-BUR-ger呢? ......呢個可能同香港人早年用通勝學英文有關掛hahahaha...

2. 句子不完整
英語是用來溝通的, 英語之所以為"語言", 是因為佢有語法grammar. 咪以為係日常生活講下D英文單字, 個女就會好快識講英文. You are simple!

3. 誤教外語
記憶當中, yummy應該唔係英文, 好似係Italian, 後期因為太廣泛應用, 所以"yummy"亦納入英語辭典裡, 但只是一個slang的用法. 所以, 要考名教小學父母, 記得教埋 "Delicious"啦!!!

4. 不中不英, 糊亂造字
如果你覺得用"yum唔yummy"係可以教到小朋友學英文既話, 咁你又接唔接受到個女同你咁講英文呢?? -- "媽咪, 你Like唔Likey呀?" "媽咪, 去公園玩hap唔happy呀?" "媽咪, 呢條裙prett唔pretty呀?"

家陣好多人已經話香港人不中不英, 作為家長, 好應該以身作則. 你夠薑既, 唔該全英語對話咯.

後記: 數年前曾經在街上聽到一名婦人望住個天同個仔講: "B仔, 你睇下個天上面個moon?幾圓幾大!!" 請各人對該名受害小童默哀......................

打份工者

拍戲者, 駛唔駛搞到成個中環中心大混亂!! 封晒d 出入口, 返工勁兜路先入到大堂, 星期六想買個早餐者, 唔駛趕到咁絶呀, 行到火都黎埋先買到個十蚊早餐, 真係賤. 中午十二時半, 呢頭行Jubilee Street 斜路落樓下比野人, 個頭就連Jubilee Street都封埋上唔返公司, 前後不到兩分鐘時間, 仲要比人盤問.

場景: 剛由Jubilee 斜路落到地面比左隻DVD人, 跟住掉轉頭想上番斜路之際
人物:
1. 拿住雞毛當領箭的電影製作公司人員甲
2. 中環中心一名無奈的保安乙
3. 小妹

盤問對話:
人員甲: 小姐, 你想去邊呀?
小妹: 中環中心咯
人員甲: 你去做咩?
小妹: 返工咯(心諗: 唔駛做呀??)
保安乙:小姐, 呢度已經封左唔比出入架咯喎
小妹: 下? 你地d保安係一分鐘前叫我由呢到行落黎架喎
保安乙: 係呀, 啱啱封架, 你要行入去停車場大堂先搭到Lift架啦
小妹: ...............

話說蝙蝠俠要係中環中心拍一個搶救人質的場景, 我咪就係該名人質咯.....
一陣收工時有無人可以比條繩我, 我要游繩落街!!

Hola!!

生活終於回復正軌!!!! 感謝各方好友的支持和幫助, 結婚party終於圓滿結束, 尤其是兩位新入宮既歌姬的表現真在令人歎為觀止, 真係要好好打賞:) 好想快d睇到個video啦, 因為當晚腦海一片空白, 都唔知發生左咩事, 淨係知道笑足成晚, 然後好似走難咁野都未執好就走左去西班牙.

呢次旅行都係跟王氏自由人旅行團, 今次安排都算周到啦, 個領隊都好細心, 係語言能力差少少啦, 不過好彩個導遊都識講少少西班牙文咯(hehehehe). 西班牙真係幾靚噃, 係條街少少污糟啦. 好奇怪, 堂堂歐洲人, supposed to be educated, 竟然人人都周街拋垃圾, 由老到嫩, 肥到瘦, 靚到醜都係咁. 我本來都好想試下佢地咁, 隨街棄掉d車飛呀, 入場券呀咁, 但真係做唔出喎大佬!!! 除左拋垃圾, 原來當地人都唔鐘意排隊. 不論係搭巴士, 搭輕鐵, 比錢買野, 其實, 都要爭崩頭, 感覺好似返左大陸咁.

印象中講西班牙文的人應該係好鬼Latin, 好熱情友善個種, 不過去到又發現西班牙人不太熱情, 亦不特別友善. 可能我一時忘記了, 那兒是西班牙, 不是Havana. But having said that, 西班牙都係一個值得去既地方黎既.