包我啦!!!我電話係9777-4...

望著坐對面的同事, 突然覺得她像悲劇人物. 人到中年, 過埋生日, 大大話話都三十有六, 當女人在這年齡可能己上位做經理或上岸的時候, 她還剛從秘書行列, 升任為公關大員行列(雖然我不知道她此前做了什麼big PR achievement而得到升任). 年近四十, 方發現書到用時方恨少, 努力攻讀一間英國不知名大學的遙距學士課程, 連記者問她是哪間大學的degree, 她也支吾以對, 不知所讀為何事. 可能一切對她來說得來不易, 因此, 對著一個平凡懶人如我, 平時表面善良的她總是很有戒心, 時常做出一d"非常小人"的動作. 我衰樣寸, 成日比人以為我好aggressive. 其實, 那位同事比我更aggressive, 只是, 她好像用錯了手法. 這樣是否同一個人的education level有關我不知道, 只知道自己最怕遇到這種人, 奈何這種人到處都是.

不知這是否公關行業大趨勢, 喜歡升秘書做公關. 舊公司亦有一名同事由秘書升任做PR, 同樣地, 我不知她幹了什麼PR而得到賞識, 巴結老細是否一種PR? haha....不幸地, 我亦於同年加入該公司做PR. 能夠由秘書,後正名為公關, 對她來說, 一切都是得來不易. 所以她除了bra罩外,亦擁有超級防護罩. 而惡夢由此而生, 在記者界散播對謠言, 工事上把所有事情都收收埋埋, 在同事間"盛讚"我係一條好aggressive既女等等.

究竟點解我成日比人話aggressive 呢? 宜家我既生活係, 返工時想準時放工, 得閒都心郁郁想請下病假, 放工返屋企睇電視或上網, 最好十點半前有得訓教. 呢d 生活算不算aggressive 呢? 最理想既, 當然係被人包起唔駛做, 咁想比人包, 算不算aggressive呢? 究竟係佢地眼中, aggressive既定義係咩呢?

Anyway, 諗番轉頭, 因為我既出現, 令到部門間的同事自動自覺地去讀書增值, 又令佢地比以前更"上進", 更"勤力"地工作, 甚至做一些超乎工作範圍的事情. 其實對公司來說都是一件好事....原來我是被利用了!

網上恐嚇

近來開始反省寫blog的意義, 為何而寫, 為誰而寫, 何寫何不寫? 有人寫黎想出名, 企圖突圍而出, 成為網上作家, 發財立品. 有人寫黎純為炫耀, 把自己一張張"最美"的照片放到首頁, 看得煩厭. 亦發現現今好多"年青人"(define: age between 12-24)不善溝通, 喜愛把自己的Xanga當作電話號碼般與新相識朋友交換, 想識我嗎? 睇我個Xanga啦! 連講電話都慳番. 亦有人寫出黎想找知音人, 給自己一點鼓勵.

咁我點解要寫blog呢? 原因好簡單, 以前有寫日記, 但現今已沒有那種高尚情操, 買一本日記部, 一筆筆的記下軼事. 倉頡輸入法的奧妙之處, 在於能夠把中國傳統文字一律簡化為五劃以內, 比簡體更簡體! 在現今講求效率的社會, 倉頡非常符合我呢類懶人的要求. 所以, 在傳統媒體同新媒體的取捨之間, 我, 作為一個懶人, 選擇了後者. 於我, blog=日記. 就係咁簡單.

早前寫了一篇關於朋友婚宴的隨筆, "各界人士"反應之大, 實在始料不及. 怕別人看到, 一傳十, 十傳百, 得罪主人家嗎? 怕, 我當然怕. 但對不起, 我這裡沒有censorship機制. 我要是看你不順眼, 你明天極度可能成了本人網上日記的主角, 一洩心頭之憤. 怕別人看後不開心嗎? Hey! 你偷看我的日記我都未話你, 你還對我耍脾氣幹嗎?

Okay, 怕成為日記的主角?.....那就對我好一點吧!!! 哈哈哈哈.....

進化論

今天下了濛濛雨, 午餐外出時忘了帶傘, 好彩兩不大, 反正我都唔鐘意帶傘. 平時返工時總發現有d人鐘意打橫行, 當我直前行緊時, 有d人會突然係你前面出現, 又或者有d人會慢慢係你左前方, 行下行下行左係你前面, 之後仲要減慢速度. 呢個時候既我, 都會因為前面無打燈既關係, 誤踏人地對鞋. 跟住我都會匆匆講句solly, 再心諗:"抵你死".呢個情況係落兩時更甚.....

人類打橫行的情況,己經根深柢固, 並且伸延至生活的每一個細節. 例如老細有時講野會打橫黎講, 將d impossible既野講到好似possible咁, 跟住做細既就因為飯碗的關係, 會打橫黎做野, 屈, 呃, 誘, 騙, 咩都做齊, 為保飯碗不理手段. 跟住老細會認為"嘩, 你咁都做到!" 就變本加厲,如此下去, 形成了一個"打橫黎做"既辦公室文化. 又例如係茶餐廳d阿姐, 會攞住杯凍檸茶埋黎同你講呢杯係凍檸水. 又例如早前朋友的朋友要悔婚, 麻怨認識十多年的男仔一直都無上進心....咁....你十多年前都識佢架啦. 呢d都係人類繼打橫行後, 開始學識打橫黎講野既一d日常例子. 思維會影响行為的同時, 行為亦會影响思維. 駛得多橫手, 諗野都會打橫黎諗. 好似政府話d舊野值得紀念, 所以鐘意拆左d舊野, 再起番d新野黎紀念d舊野咁.

估唔到人類由猿人時代, 進化至能兩腳直立走路的人類, 現已進化到能兩腳直立並打橫黎行, 厲害!

Demae Itcho!

細細個就鐘意食雜糧, 次次都係爸爸買返黎的. 印尼蝦片, 蝦條, 桃蝦多, 益力多, 綠箭香口膠, 黃箭香口膠, 嘉頓加拿餅, 聰明豆, 麥提沙....嘩...統統都係摯愛. 呢d野阿媽梗話無益, 所以細個咪唔鐘意食阿媽煮既飯咯, 淡而無味. 就算煮快熟面, 都會淨係煮蝦子面. 後期大大下, 阿媽變得越黎越懶hehe...竟然買左"出前一丁"返屋企!!!!! 對於呢個一直受禁制既家庭食品突遭解封, 簡直開心死啦, 阿媽買下又一種味, 買下又一種味, 不過最終都係鐘意原味同雞湯味. 好似係佢自己鐘意食多過我鐘意食. 就係咁, 係舊屋個廚櫃裡面, 永遠都會有"丁麵"既存在. 呢個意義好重大, 証明左阿媽開始唔鬼理我, 令我既飲食自由市場空間大左, 想食既野多左, 體重亦有年年上升既趨勢. 阿媽一唔係屋企, 就會乘機煮"丁麵", 有時仲會起"雙飛"添噃hohoho.......

細個成日聽d同學仔講話出前一丁有膠質, 會黐實d腸. 今日諗番, 真係好鬼記得有個小學同學仔話佢姨媽就係咁樣黐實晒d腸死左. 唔......我對佢姨媽既死深表婉惜, 但我對佢既死因, 心表懷疑. 究竟, 係佢阿媽想藉姨媽既死乘機嚇佢唔好食咁多出前一丁?定係佢其實就係出前一丁既死敵"香港永南公仔麵"既後人, 想從校園出招打擊競爭對手呢? 點都好, 呢d咁既傳言, 我細細個就知係假架啦! 唔係掛, 食麵會黐實d腸? 我諗如果佢話佢姨媽食丁麵唔咬斷就咁吞, 所以kick住晒d腸, 會可信少少咯. 最搞笑係, 呢個同學仔之後亦和我同一間中學, 佢仲係校內高材生添, 中五時仲坐我隔離, 有日我問番佢姨媽單野, 佢淡淡一句話:"我唔記得咯喎!...." 嘩! 唔係掛! 呢個係咩答案, 單野我記足六,七年, 你家陣竟然話我知唔記得!!!!! 點搞呀, 咁究竟你有無姨媽架!

算吧, 人地話唔記得,我亦無謂強人所難, 點都要比番個下台階人既. 証人失憶, 係疑點利益歸於被告的普通法權益下, 都算還了"出前一丁"一個清白! 向"出前一丁"創辦人安藤百福致敬!

可惜

大家既努力, 終於得到認同haha...竟然係TVB既比賽入到圍. 真係講都無人信, 我地又無熱誠, 又擺明玩野, 填張form都衰過人, 隊名又頹, 又無原創, 又無後台, 咁都入到圍. 咁...諗深一層, 可能整體表現的確係唔錯喎. 雖然有隊員偶有閃失, 但夾band, 係團隊既活動, 個人既得失, 始終不能看得太重. 彈錯音? 咁點? 咁都入圍就証明整體的合拍性和表現已蓋過了個人的錯失. 有時, 不用把自己看得太重要. 就好似做野一樣, 一個project有一team人做, 當中一定會有mistake, 但outcome係好既話, 即係整體合作好才會成事. 個人的mistake, 咪當係經驗咯. 有邊個大師上台未錯過? 容祖兒唱歌都甩咀啦...咁點? 唔通收山咩?

各人都覺得可惜, 入到圍都唔再玩. 大家有付出過努力, 我練鼓都練到手軟啦, 記pattern都記死, 難得可以打到咁輕鬆, 真係好少有. 始終呢d咁頹既比賽, 咁街坊的show, 咁無人睇既電視台, 咁無壓力的表演舞台, 真係好難搵到. 正當各人一度再鼓起剛勁努力練習時, 就因為大會知道我們有隊員未能準時出席而另找一隊入圍.... 天啊.... 真係晴天霹靂. 當然, 呢個真正的原因我地無向該隊員講, 只係話未能安排最尾一隊表演. 呢個, 都係team work的精神, 不能令隊員有hard feeling(雖然可能係我地諗多了, 或是職業病)

有時, 世事就係咁, 又想上台, 但又不想miss or risk其他野, 世事點會咁完美. 另一隊友講得啱, 邊有比賽會就晒參賽者架, haha...諗番起, 我地既要求雖不過分, 但係不合理的. 但當時大家都有份和議呢個決定, 呢個已變左係team decision, 所以無得講既. 不過有樣野大家都唔係好明, 讀書時走堂阿sir都唔會再講番上一堂d 野架啦, 咪問番同學仔攞notes自修咯, 再唔係就問下阿sir囉, 自己有底子, 就唔會一d都跟唔到架呢.hmmm...Anyway, 每人都有自己的priority, 呢d又係無得講既.

入到圍再玩, 都係當攞多一次經驗, 你估真係要贏嗎? 難得有人叫你再玩(唔係自己話要玩), 都猶豫唔想玩. 大家都覺得真係有點兒無癮. 難得大家都能豁出去, 不當這比賽是什麼一會事. 連平時緊張得要死的隊員都有勇氣再踏舞台....還怕什麼? 像隊員講的一樣, 課可以惡補, 但大家都一把年紀, 好難會再有踏上舞台的勇氣lu...

飲飲飲!

又去了一個朋友的朋友的飲宴. 我都懷疑到最後新娘或新郎會否知道我來了, 或者, 他們只關心誰沒有比禮金, 或誰比得多, 話之你有無到. 甫到場當然禮牌無人會理你, 找個空位安頓自己? 定係呆企到開席? 適隨尊便, 反正放底入場券便是了. 理解擺酒是一件頭痛的事, 但頭痛還頭痛, 但願不要把自己的婚宴, 變成是茶餐廳宴客吧! 把朋友來個大兜亂, 搭枱的坐著一圍都是陌生人, 不是吧. 我既正職係公關, 但唔代表我social haha... 要一個event成功, 賓客的感受, 永遠是event的首位. 最慘莫過於同枱兩位單身男, 屬攀山隊嗎?又不是...是隊員嗎?又不是...原來是另一隊球隊隊員. 如果他們早知道自己會同三家人同坐, 不知他們會否改變初衷.

中式酒席間新人在場一般都忙著拍照, 朋友來了招呼的一定不會是主人家. Jesus christ, 點解會係咁? 朋友來了道賀, 你們都不屑一顧嗎? 都係個句: 理解擺酒是一件頭痛的事, 但頭痛還頭痛, 但願不要把自己的婚宴, 變成是茶餐廳宴客吧! 個個擺酒都係咁既話, 索性取消兄弟姊妹團吧, 隨便找個侍應招呼便行了:"隨便坐, 幾多位? 男家定女家(吸煙唔吸煙)? 埋面呀, 有卡位....無位呀? 搭住枱先啦, 有位同你轉."

全場的高潮, 莫過於唱歌助興啦...邊個唱? 咪係新郎....個朋友咯. 真係識佢老鼠, 三九唔識七上台獻唱, 真係似足公司annual dinner, 突然會有其他部門同事上去表演咁. 不過人地話晒十九區比賽冠軍喎, 梗係要show下啦. 十九區? mud仲有呢d比賽架咩?

講到重點, 野食. 都係個d啦, 不過不失, 最佩服係碗翅, 可以把中國傳統食品都整到好似BB仔既糊仔咁"傑", 宜家都已經好少見咯. 真係抵食嘞.

走了, 朋友向友人道別時, 不知會否有人驚訝: "啊! mud原來你地坐係我地後面咋?" hahaha...有都唔出奇. 願他們不醉無歸!