返來呀...返來

返來了. 沒有update個blog有一段日子, 以為只是提不起勁寫字, 怎麼連打字的氣力也沒有. 我想不是沒有氣力, 只係老問題, 無恒心把事情做好的本事. 我想講既係...對不起, 老細, 你好似升錯人了 哈哈哈...哈哈哈....!

呢個世界有好多密碼, 信用卡密碼, 手提帳號密碼, 網上理財密碼, 提款卡密碼, 保險箱密碼, 達文西密碼, 仲有辦公室密碼. 係, 辦公室係有密碼的, 除左門口要員工証先入得之外, 仲有d密碼就寫在每個人的臉上, 只是你有冇本事解碼, 同埋睇你個解碼器質素如何, 會否解錯碼, 差錯氹等等. 真係好矛盾, 年資高, 職位高, 又比人話等退休; 年資高,職位低, 又比人話係公司負資產; 年資低,職位比人高, 又比人話博紮,aggressive. 喂, 你想點? 駛唔駛黎個排行榜, 按體重, 年齡, 生肖, 八字來一個九宮飛星圖, 睇下下次應該升邊個? 咁夠公平未? 人事密碼真係好難解, 一個email要顧及多方面感受, 言語間又要令人明白弦外之音, 就係draft 一個email已花了半天時間去諗應該點寫. 咁叫efficient? 試過有某人解錯碼, 向老細投訴話小妹點佢做野. OK. 既然人工容許我把每隻字都要精雕細琢, 我唔mind 咯.

原來我才是copywriter.

絶頂．好波

睇完世界盃，施丹一招"頂你個肺"成為全城佳話．朋友齊開盤，估下對方究竟講左ｄ咩去挑釁施丹．以我的聰明和機智(haha...)，我就估係 "收皮啦，(死)光頭佬!". 收皮，施丹都收緊喇，人地都最後一場，心情一定忐忑不安．退休，其實都係一種壓力，一般人都需要時間適應，何況係一個平時生活咁講規律的職業足球員呢?　收左皮，有咩做呢?　點同個社會聯繫番呢?　物質生活雖然無憂，但係精神上隨時脫軌，心理負擔真係好大(講到好似自己退休咁添hehe...)，所以在球場上的火突然大左ｄ，都可以理解．至於光頭呢家野，係男人既大忌．比人話收皮 +　光頭，嘩!真係佛都有火啦．不過又何苦呢?

前排買左本倪震寫的"絶頂愛情"，"頂"得像施丹一樣精彩．有愛情煩惱，又唔想同人講，但又想有人開解下你的話，不妨買一本過目．書內載有讀者寫比倪震的信件，都係叫佢解答下Ｄ愛情煩惱等等．不礙乎都係比人飛，要飛人，有第三者，做人第三者等．倪震的見解不是特別獨到，只係佢Ｄ語氣和用詞都真係幾抵死，抵死到連我都感受到來信人的自作孽，自尋煩惱和自取其疚．所謂當局者迷，都唔怪得人既．朋友成日話兩個人起埋一齊要開心先叫夾，咁．．．人又好難成日都係亢奮狀態喎HAHA...　其實，愛情係咪真係好似電視講，同感冒一樣呢?　所謂感冒，包括多種病徵：發燒，流鼻涕，喉嚨痛和頭痛等...有齊大部份呢Ｄ病徵，先至係感冒．　咁愛情係咪都一樣呢?　以同一邏輯，所謂愛情，是否亦應包括開心，失望，內疚，感激，憤怒，喜悅，感動等元素呢．．．是但得一樣，都不能稱之為愛情嗎?

朋友啊

早前與朋友出來吃lunch, 好開心呀, 真係好耐無見. 朋友快要結婚了, 真替她高興, 能做朋友已是一種緣份, 能做男女朋友更難得, 做埋夫妻就更好. 畢業後各有各的經歷, 雖很久沒有見面, 但友誼的基礎還是不變的. 變的, 只是外貎, 打扮, 談吐和舉止, 是的, 返工都係要正經d既. 大家也是識於微時的好朋友, 算不上是成日見面的那種, 但每次見面總是說過不停就是了. 然後滿足地各自投入各自的生活, 暗自高興還有這樣的朋友可以讓你暢所欲言, 那種信任和安心, 任何一位工作上如何親密的伙伴都唔會再有.

工作了數年, 看見工作桌上的咭片盒三大個. 咭片擠得滿滿的, 但八成的人都唔會再有聯繫. 係我唔夠活躍? 定係呢d係正常現象呢? 任何場合見到人都要派片, 到現在我也不太習慣, 覺得自己好似收藏緊一張張閃咭咁. 有次朋友見到我, 問我攞咭片. 朋友啊, 我們不須要以一張名片聯繫著我們多年的友誼吧, 有事咪打手提囉. 總覺得派片是一種"公事行為", 是商業的, 炫耀的, 另有目的既一種社交行為. 對於朋友, 用不著做這一套吧.

一公升的...

朋友介紹看一公升的眼淚, 待了很久才的起心乾, 一口氣用了四天時間完成十一集旳日劇. 可能是期望太高, 看過都是一般. 劇情都是一貫的日劇式, 重說教, 集集都有人用一至兩分鐘時間講道理, 然後博得一致掌聲之類. 好彩, 劇集尾升還是吸引的. 主角的疾病一天天的惡化的過程和她的心路歷程都令人感動的. 所以都值得一看.

睇劇集時沒有块堤, 反而晚上想起上星期與外婆飲茶, 發現外婆的身體狀況變差了, 瘦了很多, 面色也不好, 內心很不舒服. 是否外公去世後, 令她失去了應有的意志呢? 個晚突然獨自傷感起來, 哭得像块了堤一樣, 腦裡有想起很多兒時跟外公外婆住的點滴.

我懷念...
外婆煮的炸菜肉餅;
外婆拿著鐵罐買我最愛的魚蛋粉外賣;
外婆和我一起等校車;
放學後嚷著要外婆買腸粉和燒賣作零食;
幼稚園時到醫院看病後因外婆唔准喝凍飲, 突登唔跟外婆返家, 在慈雲山流連了一個下午, 終被警察叔叔抓回察館, 害外婆驚了一個下午(hehe..對不起);
外婆以工整的字體幫我簽家課冊;
外婆在廚房bump火水煮食的身影;
一次突然得到怪病, 外婆慌忙背著我上落五層樓梯看醫生;
騙著外公唔搭校車獨自走路上學(最終當然會被揭發hehe...);
外婆帶我去造校服;
外婆週末帶我去何文田村玩機動遊戲兼食雪糕;
週末跟著外公去飲茶, 然後到公園仔乘涼, 細聽著外公戰時經歷(雖然是重覆又重覆, 還是吸引的);
新年和端午節外婆親自炮製的蘿白糕和種子....

值得懷念的片段實在很多很多, 自出世到初中都跟著外公外婆過的日子很充實, 很滿足, 很特別, 亦很自豪. 他們在我和姐姐小時候的付出係無得衡量既, 我是哭了, 儘管流了一公升的眼淚也無法報答他們. 所以, 我寧願流一公升的汗水, 起碼可以減肥 hehe...又是廢話.