物盡其用

回顧小妹的工作經歷, hmmm....工作了六年多, 做了四份工, 好明顯, 無一份做得長, 只求年年加人工, 公司唔加, 即走. 初出茅廬, 心想搵到份好工, 有個好老闆, 教曉我做野之餘, 都教下我點做人. 當然, 現實都不會太理想. 但諗番轉頭, 就算一個老闆幾衰都好, 總會係佢身上學到d野. Whatever it is. 簡單d講, 一個衰既老細, 就係一個很好很好的反面教材.

第一個老細, 一返工便tui兩杯威士忌, 一身酒氣, 常工作至深夜, 只顧自己meet sales quota, 完全閒置我呢個"中文大學畢業生"!!在公司party酗酒, 在客人面前飲醉大叫, 儀態盡失. 她, 亦是失婚婦人一名. 我做了半年, 頂唔順, 走了. 從她身上, 我明白到一定要生活檢點, 尊重自己, 才受人尊重.

第二個老細, 驚為天人, 很難想像一名才三十歲初的酒店公關經理, 外型會拍得住肥姐, 再架上一副比李家誠更李家誠的黑框眼鏡, 難怪成為全行談論焦點. 係佢身上, 我深深體會到做女人, 千萬不可走樣! 因為, 肥人, 永遠是世人恥笑的對象.

第三個老細, 是一位唔睇報紙的經理, 只識得工作範圍以內的東西, 對外界事情漠不關心. 三十多歲人, 對自已國家的生活文化踐踏得一文不值, 對西方事物卻萬般傾慕, 努力在做一位"外國人", 看在眼裡, 著實覺得可笑. 作為一個人, 對自已文化都看不起, 對自己的文化都不認識, 又如何認識自己?又如何使人看得起你? 有點本末倒置吧.

第四位老細, reviewing in process.....

所以, 其實老細有幾不濟都好, 點都有d野比你拎走既.........

食家

一向不太留意飲食節目, 直至韜韜的出現. 因為夠變態, 呢頭話"呀女, 睇下前面隻袋鼠仔幾得意, 佢地成日跳跳紮, 好健碩架!", 轉頭就話"一陣我地會用佢地d肉黎煮紅酒汁, 佢地d肉咁健碩, 食落仲彈口呀!" , 然後, 袁彩雲會話"好呀好呀, 嘩, d袋鼠真係好cute呀, 唔知食落會係點架呢?好想快d食呀韜韜!!!"..........請問, 呢d係咪人講既說話? d 動物生勾勾咁可愛, 竟然會諗起切佢地, 煮佢地, 蚊佢地, 食佢地, 除了變態, 無野可以形容呢班所謂既"食家". 咁樣既節目, 直頭扭曲了細路仔對大自然既價值觀, 嚴重違背保育意識. 與秋天的童話不同的是, 韜韜無比人投訴. 點解? 因為社會的價值觀其實已嚴重扭曲, 因為香港人的表面和短視, 聽到粗口就扮正衛道之士, 實質就是大眾普遍嚴重缺乏分析和判斷能力, 嚴重欠缺自我價值的肯定, 使一切淪為表面, 膚淺......

講下講下唔知講梗咩. 其實我想講既係前天睇到一位自詡為才女的模特兒與一位"北七"男主持一個飲食節目, 越睇越覺得原來現今的才女亦不過如此. 成個飲食節目, 最常聽到既係 "嗯...........好味呀!" "嘩..........好彈呀!" "嗯........d口感呢, 好似呢, 我地食開個d咩咁呀!" "啊.......好靚呀!" 呢d "嗯.......嘩...........啊"的助語詞應用, 每數秒便從兩名主持人口中聽到. 如果我係盲既話, 我會以為自己聽緊咸濕故仔.

上集仲精彩, 人家介紹正宗西班牙菜, 人家介紹西班牙火腿, 你又話味道似金華火腿; 人家介紹西班牙甜品Turron, 你又話好似鳥結糖. 收皮啦, 咁即主持質素, 比舊金你食都話似係屎架啦! 睇左成個節目, 結論係呢兩條磨碌在浪費食物!

去她吧

與同事的不和暴光了. 對, 每人都有自己的agenda, 而亦有做事的bottom line.

但管她吧! 反正工作不是我的一切.......不是嗎?