自製冰淇淋

大熱天時買了兩pack益力多, 忽發奇想自製益力多雪條. 好緊張....數小時後即將揭曉!!!

朋友

早前約了中學同學出來閒聊兼去Intercon high tea. 真的high, 因為大吃大喝一輪之後竟然唔駛比錢, 多得舊同事John Chee的好客, 令到我又可以再一次貪便宜haha...

談的話題多的是, 始終, 都係讀書時期的朋友最好的.

GoGoGo!!!

有記者行家離開了, 離開前帶著憤恨, 而我....竟然鼓勵佢離開前與欺負她的同事開拖....
我是否把自己做不到的, 投射了在她身上?

實情是, 她真的開了拖. hahaha.....這構成教唆使用暴力嗎?

希望快點轉工便好

謎

回歸十年, 香港人又創下一項歷史, 向世界上16座最危險活火山中的一座捐驅. 她, 成為舉世第一個華人, 香港人, 近距離踏足活火山口. 她, 亦應該是得到聯合國同意, 出動維護和平部隊拯救的首名華人(亦希望是最後一位), 情形好似Saving Private Ryan.

究竟, 佢點解一個人去剛果? 點解咁多人唔死, 唯獨佢跌死? 究竟佢係咪真係無聽導遊勸告, 私自走落去呢? 定係, 導遊想謀財不果, 順勢推事主落去呢? ..... 謎!!!!

昨天跟進報導, 事主家人不打算往非洲領屍, 有待運送回港. 如果一名至親去世, 不是總會有衝動想到當地親身領回家人遺體嗎? 起碼來一個認屍程序都要掛. 究竟, 點解呢名遊客既屋企人可以理智如此? .....謎!!!

今天再跟進報導, 事主家人不打算往非洲領屍之餘, 還同意遺體在當地火化. 下?? 運返香港都廢事?? 究竟, 事主身前同家人的關係如何? 係咪因為同屋企人鬧翻, 所以才決意出走非洲, 走到世界最危險的地方來一個大解脫? 點解屋企人連事主最後一面都唔想見呢? .....謎!!!

其實, 從各方面黎睇, 香港亦是一個活火山. 計溫度, 今天下午一時站在皇后大道中, 感覺猶如站在活火山口. 計生活質素, 在全球60億人口中，約有超過11億人口生活在赤貧線以下, 香港應佔了當中的七百萬人, 每天活在水深火熱之中. 計空氣質素, 香港的空氣污染日益嚴重, 日日吸住廢氣生活, 猶如慢性自殺, 慘過吸硫黃. 要睇活火山? 邊駛去非洲咁遠.

不過硬係要去既話, 我比大家的愛心提示係: 買番個長鏡頭先啦!!! 咁咪唔駛走落去影咯!!!! 阿醒!!!!

時間加，阿里媽腥假??

近日在商討十月旅行去邊度。話晒呢次無論在公司假期，銀行儲蓄都可以算係一個“晒冷自由行”，小妹當然積極參與討論。

開頭諗住去東歐，夠晒蘿蔔剃黑啦…不過最終建議遭中央駁回，理由係東歐太多國家，無時間plan唔切…咁又啱既。

某日小妹忽發奇想，係辦公室發呆時想起西班牙這地方，馬上撥電話訂下超筍優惠機票，然後興緻勃勃兼語帶得戚地向中央滙報。最後，建議亦同樣遭中央駁回，理由係十月歐洲入冬，日照時間太少，行程會好匆忙，夜晚治安又不太好.....而且個度呢.......。

今日，小妹於事務所不再發呆，不過發夢去了古巴。小妹揣測過中央心意，對古巴的興趣甚濃，且古巴屬南美，天氣得宜，日照時間多，機票貴但資料顯示當地消費便宜，實無死啦。於是乎我又試好得戚咁係公司攞埋本古巴旅遊書，資料充實，理由充分地向中央做了口頭建議，並即時得到中央的口頭回覆： “去得古巴，就要去多幾個國家啦，話晒機票咁貴. " 呀,又係喎. 依? 不過唔係話去幾個國家無時間plan唔切咩?

唔緊要，澡涼個陣終於比我諗到一個合乎晒所有旅遊條件的地方，那裡十月開始有充足日照時間，white night國際知名。人種單純，治安非常好，罪案率奇低，那裡不會有 “鄰近國家”，交通方便，行程輕鬆，因為基本上成個地方就係得一個大景點。個度就係……登登登登………就係南極。

講下講下，小妹覺得十月時間越來越近，諗下諗下，其實仲有好多濕碎野要開始搞啦，invitation 啦，guest list啦，萬一唔好彩A計劃唔掂，都有個B計劃啦!!!咁如果真係唔好彩要B計劃，又要再搵個venue啦，再諗下點算好啦…!!!　不過中央好有信心，並表示: “十月，仲有大把時間plan啦!”

對，每個人對時間都有不同理解，正如王家衛導演十年才是一天hahaha…

突然覺得， “天秤座的男人”和 “不能結婚的男人”，有幾分相似, 卡娃兒呢hahahaha…